BELADIN, 7 Nov: Projek Ngaga Baru Sekula Primari (SK) Tambak di pelilih Pusa udah dikemendarka dalam renggat kelima Langgur Pemansang Malaysia Lumpar Ke-12 (RMK-12), ku Dato Sri Roland Sagah Wee Inn.
Menteri Pelajar, Inovasyen Enggau Pemansang Bakat Sarawak nya madahka, projek nya deka dipejalaika perintah besai ba baruh Opis Menteri Pelajar Malaysia (KPM).
“SK Tambak, nya udah dikemendarka Opis Menteri Pelajar Malaysia (KPM) ba renggat kelima ba baruh Langgur Pemansang Malaysia Lumpar ke-12.
“Bela udah dikemendarka suba iya nya (ngaga) taba iya, lalu aku andal taba nya udah dikelala, semina kitai nganti duit (agih belanja) aja dikena mayar taba.
“Nyadi udah nya baru ulih ngaga anggar berapa penyampau dikena ngaga sekula nya,” ku iya.
Ungkup penerang, SK Tambak udah ditumbuhka ba taun 1940-an.
Naka tu, bisi 100 lebih nembiak bisi belajar ba sekula nya.
SK Tambak iya nya sebuah aja sekula primari ti diripotka bestatus repuk ba sitak Kunsil Nengeri (DUN) Beting Maro.-TVS
