SARATOK, 7 Nov: Pejalai Projek Jalai Bajau Kupang ba sitak Kunsil Nengeri (DUN) Kalaka diatu agi nganti proses nyiri kunteriktor ari Opis Menteri Pemansang Tumpuk Pendiau enggau Kandang Menua (KKDW).
Kaban Kunsil Nengeri (ADUN) Kalaka Mohd Duri madah, iya deka projek nya dipejalaika enggau lengkas laban projek udah kelalu lama tejanggal.
“Aku seruran beratika pemansang bekaul proses tinder Projek Kupang lalu diatu dipadahka raban JKR agi nganti komiti penentu tinder nyiri kunteriktor.
“Kos projek agi sama semina kitai nganti pemutus ari komiti penentu tinder ba bagi KKDW nya, aku nerima penerang ari raban Indu Opis JKR,” ku iya.
Mohd Duri mansutka jaku nya pengudah nyerahka replika chek tulin MADANI ba Kampung Kaba, kemari.
Projek Jalai Bajau Kupang beungkus RM122.5 juta ngaul pengawa ngemanah jalai bebatu ngagai jalai tar urung 16.9 kilometer.
Projek nya mungkur pengawa ngemanah jalai tama ngagai genturung pendiau enggau sekula urung 3.6 kilometer rembus ke Rumah Panjai Ganing, Rumah Rengan, Rumah Lakin, Rumah Anau enggau Sekula Primari (SK) Entebu kelimpah nukar tiga buah jematan mit.
Enti udah tembu jalai tu jemah deka ngemandakka timpuh pejalai mensia mayuh ari Kampung Kupang ke Pasar Saratok. – TVS
