SARATOK, 7 Nov: Pemutus deka bejalaika sistem merit ungkup pengawa milih nembiak masuk Palan Pelajar Tinggi (IPT) ke diempu perintah Sarawak endang atur ke nemban.
Senator Pele Peter Tinggom madah, atur nya diperati lebih adil ungkup raban nembiak do nengeri tu ke besemekih nampung pelajar ngagai IPT dudi hari.
“Ari sukut penemu rayat mega (sistem) merit tu endang siti polisi ke manaj lalu patut dipejalaika baka ke udah dipadahka perintah Sarawak nengah Sapit Memteri Pelajar Sarawak empu.
“Nyadi sechara prinsip iya polisi tu endang manah,” ku iya.
Iya mansutka timbal nya ngagai media pengudah Program Nyerahka Chek Tulin Madani Pelilih Saratok ba Kampung Kaba, kemari.
Sebedau tu, Sapit Menteri Pelajar, Inovasi enggau Pemansang Bakat Sarawak, Datuk Dr Annuar Rapaee madahka atur milih nembiak ngagai lima IPT diempu Perintah Sarawak deka nitihka Sistem Merit.
Lima IPT tu iya nya Universiti Teknologi Sarawak (UTS), Universiti Swinburne, Universiti Curtin Malaysia, Kolej Universiti I-CATS enggau Palan Penyulut Teknologi Sarawak (CENTEXS).
