SARATOK, 7 Nov: Agih belanja sepenyampau lebih RM11.8 juta udah diserahka ngagai 129 Komiti Pemansang Enggau Pengelikun Genturung Pendiau (JKKK) di Parlimen Saratok iya nya ngaul sitak Kunsil Nengeri (DUN) Krian enggau DUN Kalaka.
Senator Pele Peter Tinggom madahka, agih belanja ba baruh program pengelantang komuniti MADANI iya nya komitmen perintah besai deka nyaga pengelantang sereta kaul rat entara raban tuai perintah besai enggau perintah Sarawak di Saratok.
“Enggau pemisi kerejasama tegap entara Perintah Besai MADANI enggau ADUN Kalaka sereta Krian sereta Opis Pelilih, aku ngasai empas iya ulih dipeda di Pelilih Saratok.
“Nya alai, Pelilih Saratok tu nyengkaum Kabong (nerima agih belanja) ti pemadu tinggi,” ku iya.
Pele mansutka jaku nya rambau Pengerami Nyerahka Replika Chek Program Tulin Madani Pelilih Saratok Di Kampung Kaba, kemari.
Udah nya, ku Pele sektor dagang temuai enggau hospitaliti nerima agih belanja ti pemadu mayuh laban kedua-dua sektor nya mega ti pemadu mayuh dipinta pengani nengah program nya.
Tandu iya, JKKK ke bekaul patut bejalaika atur ti lebih proaktif dikena nentuka juluk perintah ngemansangka komuniti ba menua pesisir nengah Program Tulin MADANI ulih dijapai.
Bisi 193 buah JKKK udah berejister di Saratok, lalu semina 150 tauka 77.72 peratus ari penyampau nya bisi minta agih belanja nya.
Pelilih saratok ngerikodka rikod peminta ti pemadu mayuh dalam Program Sejati Madani ba selampur Sarawak ke berengkah dibuka kena 25 March nyentuk 30 September tu tadi.-TVS
