SIBU, 7 Nov: Estet nupi jani ba kandang endur pemesai 575 ekar di Sungai Selabi, Selangau bisi potensyel ngeluarka penyampau 450,000 iku jani setaun.
Menteri Industri Pemakai, Komoditi enggau Pemansang Wilayah Sarawak, Dato Sri Dr Stephen Rundi Utom madahka, estet nya ti disikap ngena fasiliti moden enggau baru dijangka ngeluarka asil keterubah dalam taun 2027.
“Projek ke berega RM300 juta nya dipeda ulih meri asil penatai pemisi tambah ngagai Sarawak penyampau RM1.5 bilion manggai taun 2030.
“Fasiliti tu ngena teknologi baru dikena nentuka biopengelikun ti bisi daya nyeliahka penyakit Tabin Jani Afrika (ASF) ke kala nyau deka ngerusak industri nupi jani di nengeri tu,” ku iya madah ngagai pemberita pengudah pengerami nasih tanah fasiliti nya, kemari.
Kandang Endur Nupi Jani (PFA) Selangau ti digaga ungkup 12,000 iku penupi jelu ditaga tembu dalam timpuh setaun sereta berengkah mansutka 150,000 iku jani setaun dalam taun 2027.
Kelimpah ari nya, PFA Pasir Puteh di Simunjan ke udah nganjung eksport lebih 350,000 iku jani ti berega RM312 juta kenyau ari taun 2017 sereta kurang lebih 2,500 iku jani idup ninting minggu ke Singapore dijangka ngembuan penyampau semua jani ke ditupi ba sesebengkah estet (SPP) penyampau 250,000 iku.
Nangkan ke nya, Estet Jani Moden (MPF) Ensengei di Serian ti agi benung digaga deka ngembuan SPP penyampau 50,000 iku manggai taun 2030.
Tandu Rundi, PFA Selangau nya dikemansangka Best Pork Sdn Bhd, subsidiari ngagai siti kompeni ke udah tampak nama sereta tegap ba dalam pengawa nupi manuk dagin enggau telu di Sibu.
