ABU DHABI, 7 Nov: Penyereta Sarawak dalam aum pemadu besai kuasa di dunya ngayanka pemekuh global udah nemu senentang tanggung pengawa enggau inisiatif wilayah tu dalam pemansang kuasa baru ti meruan.
Premier Sarawak Datuk Patinggi Tan Sri Abang Johari Tun Openg madahka tu siti aku ngagai Sarawak enggau Malaysia lebuh diundang nyadi panel bekunsi senentang kuing tuju hidrogen.
“Taja keterubah ya Sarawak nyereta ADIPEC, eksibisyen enggau aum pemadu besai di dunya, tu ngayanka Sarawak diaku ba renggat global senentang pekara ti digaga Sarawak,” ku iya.
Nerang silik ku Abang Johari madah, pemekuh industri besai baka Jepun enggau Korea Selatan diatu meda Sarawak nyadi kaban kunsi dalam pemansang kuasa ulih dikemaru.
“Enti tu nyadi dalam dunya, aum ti pemadu besai di dunya, kita ulih meda serikat-serikat ti ngambi bagi enggau personaliti ti mantu dalam pengawa berunding tu.
“Ba aku Sarawak diatu udah dikelala nyadi siti ari pemekuh industri ti pemadu beguna dalam pemansang kuasa di serata dunya,”ku iya madah.
Ka penerang, eksibisyen enggau aum Petroleum Antarabansa Abu Dhabi (ADIPEC) 2024 ba palan ADNEC diatu majak ngerembai nyadi pelasar teknologi kuasa besai ukai agi bepanggai ba sektor minyak enggau gis.
Aum nya ngayanka mayuh agi penyereta pengemeran industri pemintar artifisyel (AI) enggau urung 2,500 buah serikat pemandang enggau lebih 200,000 temuai ari serata dunya. – TVS
