MARUDI, 4 Nov: Peranak Rumah Panjai (Rh) Ba Abang Long Sepatai, Ulu Baram lenyau alai endur beteduh pengudah rumah sida angus lengis ba penusah ke nyadi malam tadi.
Pengari Palan Operasyen (PGO), Opis Bomba enggau Penyah Penusah Malaysia (JBPM) Sarawak madah, sida nerima ripot pasal penusah nya urung pukul 11.09 malam, lalu berumban nganjung raban ari Balai Bomba enggau Penyah Penusah (BBP) Marudi ngesah palan penusah nyadi.
“Naka ke diatu, bedau bisi penerang silik senentang penyampau peranak tauka pengani rumah ke bisi bekaul enggau bekau eksiden nya.”
“Raban bomba begunaka awak enam ngagai tujuh jam nguna entukar empat roda (4WD) ngagai palan penusah nyadi,” ku iya nengah siti penerang sehari tu tadi.
Ku iya madah, raban bomba nerima penerang nya nengah siku orang ke betelefon pasal penusah angus ke nuntung rumah panjai nya.
“Raban bomba enda ulih betelefon enggau peranak ke bekaul dikena ngulihka penerang keterubah pasal penusah angus nya laban nadai bungkur telefon,” ku iya.-TVS
