KUCHING, 4 Nov: Pengawa ngatur Program ‘IC Design Make- A-Thon 2024’ ti dipejalaika Semikonduktor Turui Tukuh Mikroelektronik Sarawak (SMD) bepenau matak pengerindu nembiak ba bidang Sains, Teknologi, Injiniring enggau Matematik (STEM).
Menteri Pelajar, Inovasyen enggau Pemansang Bakat Sarawak, Dato Sri Roland Sagah Wee Inn madahka pengawa ngatur program nya mandangka mayuh anak Sarawak udah berengkah ngayanka minat sida deka belajar sereta ngaul diri dalam bidang STEM.
Berebak enggau nya, MEITD, ku iya, ngembuan mayuh bengkah program ti sebagi ari langkah rapat deka meri pengeludas pasal bidang STEM senutuk enggau misyen opis menteri nya deka ngelakuka pelajar STEM ba sekula di selampur Sarawak.
“Turui tukuh Chip SMD Make-A-Thon iya nya begian besai dalam langkah rapat kami ti dipejalaika terus, komitmen ngagai pelajar STEM di Sarawak. Nyadi, iya nya peluang ungkup bakat biak meretika bidang Sains, Teknologi, Injiniring enggau Matematik sechara terus.
“Tu senutuk enggau misyen Opis Menteri Pelajar, Inovasyen enggau Pemansang Bakat dikena ngelakuka pelajar STEM ba sekula di selampur Sarawak,” ku iya.
Iya bejaku munyi nya rambau bejadika pengerami nutup program ‘SMD IC Design Make-A -Thon 2024 di University Swinburne’ Kampus Kuching ditu kemari.
Pengawa ngatur program IC Design Make-A -Thon sebedau tu mega udah kala dipejalaika di Miri sereta Sibu, enggau penyampau penyereta iya nya 30 buah sekula sereta universiti.-TVS
