KUCHING, 3 Nov: Tim Puteri Dang Balai Yayasan Sarawak 3 udah dipadu ngempu gelar Raja Sungai Regata Sarawak 2024 ungkup Trofi Tuai Pemegai Menua (TYT) Negeri Sarawak ba achara Perau Bidar 30 pengayuh lelaki (Lokal).
Tim Puteri Dang Balai mujur ngalahka dua agi tim kering iya nya tim Landas Azam Kasihnya Warisan 1 enggau tim Udak.
Bekau ari pemujur nya, Tim Puteri Dang Balai Yayasan Sarawak 3 nempa sejarah kediri empu laban mujur ngempu gelar champion tiga taun bejurut.
Sida mai pulai perais mata duit sepenyampau RM30,000 disempulang enggau trofi.
Ungkup tim Landas Kasihnya Warisan 1 enggau tim Udak bela mai pulai perais sepenyampau RM20,000 enggau RM10,000 sereta trofi.
Udah nya ba kategori Trofi Premier Sarawak, tim Udak ke diempu Menteri Nembiak, Lumba enggau Pemansang Dagang Sarawak Dato Sri Abdul Karim Rahman Hamzah enggau Kaban Kunsil Nengeri (ADUN) Stakan Datuk Hamzah Brahim mujur ngempu gelar champion ba achara Perau Tebuka Kenyalang 20 pengayuh lelaki (VIP).
Sida mujur ngalahka dua tim kering ke bukai iya nya perau Sinaran Ratu Siska diempu Sapit Menteri Besai Datuk Seri Fadillah Yusof enggau Datuk Sallehuddin Satar sereta perau tim lumba perau Sultan Brunei Sultan Hassanal Bolkiah.
Ukai nya aja, Puteri Dang Balai Yayasan Sarawak mega mujur nyadi champion ungkup Trofi Antarabansa Borneo ba achara tebuka perau bidar 30 pengayuh lelaki enggau ngalahka tim Puteri Dang Balai Yayasan Sarawak 3 enggau tim Udak.
Achara Regata Sarawak 2024 berengkah kenyau Hari Lima tu tadi nyentuk Hari Minggu.
Sultan Brunei Sultan Hassanal Bolkiah sereta TYT Sarawak Tun Pehin Sri Dr Wan Junaidi Tuanku Jaafar bela bisi datai ngemataka pekit lumba perau nya.
Sama bisi datai Premier Sarawak Datuk Patinggi Tan Sri Abang Johari Tun Openg enggau bala Sapit Premier Sarawak Datuk Amar Awang Tengah Ali Hasan enggau Datuk Amar Dr Sim Kui Hian Sereta Sapit Menteri Besai Datuk Seri Fadillah Yusof. -TVS
