DEBAK, 3 Nov: Raban pedagang enggau pedaja ke bisi bejual pemakai enggau ai irup endang kedap ngagai ekositem pemansang sosio ekonomi komuniti di Pasar Debak.
Nya alai, Sapit Menteri Pemansang Orang Indu, Anak Mit enggau Pengelantang Komuniti Sarawak Datuk Mohd Razi Sitam madah diri chukup andal nengah pengawa ngaga Ngaga Baru Kedai Makai ke baru deka mantu mutarka isu suntuk palan dagang pemakai enggau ke benung ditapi mensia mayuh ba pasar nya.
Ku Razi nengah penembu palan makai nya ila deka mantu mutarka isu pedagang enggau pedaja ti bejual sengapa tauka nadai pemendar ba tisi jalai besai nyentuk ke ngachau pejalai trafik ba palan entepan kerita di Pasar Debak.
“Nengah penembu (palan) tu ila dikearapka ulih nangkup peminta peranak Debak ti rindu ba pengawa bedagang tauka bedaja.
“Aku nemu peminta ari peranak ke datai ari luar Debak mega mayuh kitu ngiga peluang tauka ngerembaika dagang sida.
“Nya alai mayuh palan entepan kerita dikena sida bedaha sekalika nya sida ke datai ari Sibu, Sarikei tauka ari Betong empu minta nguna palan entepan kerita dipasang kimbis lalu bejual dia lebih agi maya ujung minggu,” ku iya.
Razi ke mega ADUN Saribas mansutka pekara nya maya Pengawa Nasih Tanah Taba Ngaga Baru Debak Food Court Bagi Menua Betong empai lama ke udah.
Ku terang iya, penembu Kedai Makai Debak nya ila deka muka mayuh peluang ngagai bala pedagang enggau pedaja mit nyengkaum sida ke datai ari luar Debak.
Kedai Makai Debak ke baru nya digaga nengah Projek Rayat enggau kos belanja manggai RM5 juta.
Ba program ke sama, Razi bisi nyuaka enam buah projek RTP DUN Saribas ke beungkus RM700, 000 dibaruh kemata Kaunsil Pelilih Betong ke nyadi ejensi pengemujur projek.
Dulu ari nya, Razi mega bisi nyerahka taba dua projek iya nya Projek Ngaga Baru Entepan Kerita Surau Al-Azahari di Kampung Lalang beungkus RM80, 000 enggau Projek Ngemanah Perengkaguna Rumah Panjai Lakis Entawa (RM120, 000).-TVS
