KUCHING, 2 Nov: Aum sechara penuh patut dipejalaika pasal pengawa deka nuntut 35 peratus ari penyampau semua penuduk dalam parlimen ungkup Sabah enggau Sarawak.
Pemikir Politik Dr Mazlan Ali madahka tu ketegal dalam Sempekat Malaysia 1963 (MA63), penyampau kerusi nya enda dipadah enggau nyata dalam sempekat ti ditanggam maya penumbuh Malaysia suba.
“Aku pikir tebangkar sejarah enggau konstitusyen patut duduk begulai sereta nisih enggau silik bekaul aspek tu. Tu ketegal kitai meda bisi penemu ari tebangkar ti ngumbai pasal pengawa nuntut tu nadai dalam Konstitusyen Malaysia,” ku iya.
Ku Mazlan, pemereti senentang atur nuntut tu bisi bida mimit ari sukut konstitusyen laban penerang ari raban tebangkar madahka pekara nya nadai ditetapka dalam Konstitusyen Malaysia.
Taja pia, iya madah, pengawa nuntut nya bepelasarka pemereti ngagai penyereta Sabah enggau Sarawak sereta penyampau semua kerusi parlimen ti diberi ngagai kedua-dua wilayah.
“Enti kitai meda dalam konstitusyen kenyau merdeka, ke alai penyampau kerusi ti diberi ngagai nengeri Borneo tu iya nya seruran nambah bepelasarka ‘weightage’ iya nya pemerat, ukai dikira bepelasarka penyampau populasyen aja tang ngambi kira pemesai wilayah.
“Semua nemu Sarawak iya nya nengeri ti besai, nya alai, wilayah tu begunaka lebih mayuh sitak Parlimen ngambika pengari rayat ulih meri servis ti pemadu manah ngagai rayat enggau lebih ngasi,” ku iya.
Berebak enggau nya, ku Dr Mazlan, atur nuntut nya patut diperatika baru sereta dipeda ari sukut konstitusyen enggau semangat penyerakup entara nengeri bukai dalam Malaysia.
Tu ketegal, iya madah, pugu nambah penyampau sitak parlimen nya bepelasarka populasyen enggau ngambi kira pemesai sesebengkah kandang endur nya.
“Semua nemu, di mengeri enggau menua pesisir bebida. Chunto iya, di Sarawak bisi sitak parlimen ti ngembuan penyampau 15, 000 nyentuk 20, 000 pengundi, tang di Semenanjung Malaysia ngelui 200, 000 sereta bisi ke udah manggai 300, 000 pengundi.
“Pekara tu nyadi topik ti suah dipetalatka diatu laban, ku tebangkar konstitusyen, nadai penetap khas dalam konstitusyen bekaul pengawa meri kerusi ngagai kedua-dua wilayah. Engka, lebuh Sarawak nyereta Malaysia suba, bisi siti pengawa runding entara Sarawak enggau Semenanjung Malaysia, ke alai bisi sempekat ti meri jamin ari sukut pengelikun tauka pengidup jemah Sarawak.
“Nyadi, pengawa nuntut nya sechara personal, nya patut dipeda baru, nyema pengawa nuntut tu senutuk enggau konstitusyen tauka senutuk enggau MA63, ” ku iya.-TVS
