KUCHING, 2 Nov: Kelia, mayuh pua kumbu ke ditenun mantaika chura motif ti angat baka buah baya, buah nabau sereta buah junan.
Kurator Muzium enggau Galeri Tun Jugah Foundation, Janet Rata Noel madahka, semina tukang tenun ti tebangkar aja ke ulih ngaga ketiga-tiga buah nya.
Tang jeman diatu jarang orang berani nguji ngaga buah nya, taja pan sida landik betenun.
Ku iya madah, enti orang ke deka nenun ngena buah tu tadi, chura dalam motif nya mesti bisi pemakai ungkup baya enggau nabau, baka ikan, reptilia, tauka kera.
“Pua Kumbu ti dikena nyambut Antu Pala baka Buah Ringka Antu Pala, Buah Rang Jugah, enggau Buah Gajah Meram.Pua Kumbu ti dikena nyambut Antu Pala dikumbai tuchi.
“Kitai enda ulih mutung pua nya nyadi skirt, beg tauka kasut laban iya dikumbai tuchi,” ku iya.
Iya mansutka jaku nya rambau Program Wacana Kraf 2024 ‘Semangat Tenunan Pua’ ti diatur ba Waterfront Kuching empai lama tu tadi.
Iya nerangka, bisi tiga bansa pua ke suah dikelala mensia mayuh baka pua kumbu, pua sungkit enggau pua belantan ti bela ngembuan teknik kediri empu.
Nya alai, Janet madahka, sapa ti bisi ati deka belajar chara nenun pua kumbu, tau ngagai Tun Jugah Foundation, nyerangkung raban siswa universiti ti nyadi pelatih amali.-TVS
