BETONG, 2 Nov: Projek Pemansang Ekonomi Penuh Tumpuk Pendiau (PROSPEK) berengkah 2025 udah udah bisi perambu pemansang ke baru iya nya ngaul komuniti rumah panjai di Betong.
Dikena ngemujur inisiatif nya, Sapit Menteri Besai Datuk Seri Dr Ahmad Zahid Hamidi ke mega Menteri Pemansang Tumpuk Pendiau enggau Wilayah udah nyuaka chek sepenyampau RM9 juta ngagai PROSPEK di Betong ungkup belanja timpuh lima taun berengkah 2025.
Projek nya, ku Zahid deka meri pemaik ngagai lebih 3,000 peranak ke ngaul 94 rumah panjai.
Ku iya, nya mega deka mai ubah nengah bemacham aktiviti ekonomi ke dirandang komuniti nyengkaum ba pengawa betanam betupi, bekebun bumai sereta krafjari.
“Produk niche baka nupi manuk enggau nanam lia ulih nyadi pengawa besai ti udah ngerandang ekonomi.
“Projek tu dikearapka ulih nyungkak ekonomi sepanjai maya enggau negapka penatai pemisi peranak rumah panjai.
“PROSPEK Betong endang pengawa keterubah ti deka ngaul rumah panjai lalu kami andal tu deka mai ubah ke manah ngagai rayat,” ku iya maya bejaku ba Pengerami Tuai Begulai enggau Rayat ba Rumah Panjai Enteri anak Lengkoi di Samu, Ulu Paku Spaoh ditu pagi tadi.
Nangkan ke nya, Zahid mega madah projek nya deka dipejalaika begulai enggau Kaunsil Pemansang Tanah Sarawak (LKTS) sereta dikearap ulih muka peluang gawa ke mayuh lebih agi ngagai raban rebak baru.
“Nengah pengawa numpu ngagai ekonomi enggau produk niche, PROSPEK Betong dipelaba deka nyadi chuan besai baka ni pemansang ti numpu ngagai komuniti ulih mai ubah ke nyengala ngagai peranak ke diau ba rumah panjai,”ku iya.-TVS
