SRI AMAN, 2 Nov: Polisi pelajar nasional ti ngemeratka penyerakup, kualiti pelajar enggau pengerembai potensyel nembiak sekula ngesan tangkup pengawa besai dalam nempa rebak baru ti bepenemu, bepengelandik sereta mereti.
Sapit Menteri Pemansang Indu, Anak Mit Enggau Pengelantang Komuniti Sarawak, Datuk Mohamad Razi Sitam madahka, nengah kurikulum nasional begulai, nembiak sekula dibantaika ngagai pemanah ulah, penemu ti relevan sereta pengelandik ngambika ulih besemekih ba renggat global.
“STEM (Sains, Teknologi, Injiniring enggau Matematik) deka negapka pengerindu enggau pengelandik dalam bidang kritikal dikena nyikap nembiak sekula dalam betapi pemar revolusyen industri 4.0.
“Pia mega enggau Program Pelajar Teknikal enggau Vokasional (TVET) meri peluang ngagai nembiak sekula ngambika ulih nguasa pengelandik praktikal sereta teknikal ke diguna dalam makit kereja,”ku iya.
Razi mansutka pekara nya maya Pengerami Anugerah Perkhidmatan Cemerlang Renggat Opis Pelilih Betong 2023 diatur ba sebuah hotel tebilang ditu kemari.
Tandu iya, program inklusif baka pelajar khas mega nentuka semua nembiak sekula nyengkaum ti begunaka peminta khas bulih akses pelajar ke sama.
Inisiatif baka Pelin Pemansang Pelajar Malaysia (PPPM) mega deka terus ditegapka ngambika ulih nyapai juluk perintah ngadaka modal mensia ti bisi daya semekih, inovatif enggau beintegriti.
Iya mega nerangka, semua polisi enggau program nya udah mujur meri empas positif ngagai pemansang komuniti sereta menua.-TVS
