KUCHING, 2 Nov: Perintah Sarawak deka terus ransing nyendiaka servis ti manah nyengkaum dalam nentuka jamin bekal ai beresi ungkup rayat di wilayah tu.
Nya Alai, Menteri Ultiliti enggau Telekomunikasyen Sarawak Dato Sri Julaihi Narawi madahka, pengawa kereja proaktif enggau produktif deka terus dipejalaika  dikena napi sebarang penanggul enggau isu bekaul bekal ai.
“Taja pan menua kitai ngembuan bekal ai ti chukup dikena nyendiaka ai ti likun sereta beresi, tang kitai patut sedar bisi bemacham isu enggau pemar ti bekaul enggau bekal ai.
“Pekara tu patut diambi perati ungkup pengawa ngatur ti lebih komprehensif  ngambika bekal ai kitai sekalika bekal ai mentah tauka bekal ai ti udah diperubat tetap tejamin ungkup rayat Sarawak jemah ila,” ku iya.
Iya madah munyi nya  rambau Pengerami Apreasiasi Anugerah Servis Nyulut 2023 Kaunsil Ai Kuching (LAK) diatur ba Palan Konvensyen Borneo Kuching (BCCK) ditu kemari.
Ba pengerami nya, bisi 302 iku pengereja pengawa Kaunsil Ai Kuching udah bulih pukul rata e-Prestasi 85 peratus ke atas.
Seraya dalam e-prestasi nya, bisi  49 iku pengereja pengawa LAK udah nerima anugerah servis  nyulut ungkup sesi taun 2023.-TVS
