BETONG, 2 Nov: Komitmen Opis Menteri Pemansang Tumpuk Pendiau enggau Wilayah (KKDW) dalam nentuka pelajar bala anak ari menua pesisir terus diberi perati chukup berupai nengah beberapa inisiatif ke bisi dipejalaika.
Sapit Menteri Besai Datuk Seri Dr. Ahmad Zahid Hamidi madah, beduduk ari nya sukung ngagai pemansang modal mensia endang chukup beguna baka nengah bantu pelajar ba renggat sekula primari nyentuk ke renggat poelajar tinggi ngambika rayat di menua pesisir enda ngasaika diri dikelaung.
Ku iya nengah Yayasan Pelajar MARA (YPM), KKDW bisi bejalaika sekeda inisiatif Tanggungpengawa Rama Korporat (CSR) nyengkaum Skim Bantu Sekula YPM (SBP).
“Taun tu, bantu nya diberi ngagai 632 nembiak di Sarawak mungkur 224 nembiak sekula primari enggau 408 nembiak sekula sekondari ke ngaul agih belanja sepenyampau RM85,400.
“Bantu nya ngaul kereban sekula enggau mata duit dikena ngelempungka belanja ruang bilik ke kurang penatai pemisi,” ku iya.
Zahid mansutka jaku nya maya Pengerami Tuai Begulai enggau Rayat ba Rumah Panjai Enteri anak Lengkoi di Samu, Ulu Paku Spaoh ditu sehari tu tadi.
Nangkan ke nya, ku Zahid bantu nya mega betuju dikena meri peransang ngagai bala nembiak ngambika bebendar agi nyapai pemutus akademik ke nyulut.
Ku iya, sukung penuh baka nya deka meri empas positif ngagai apai indai tauka pengibun dikena nentuka bala anak ngasaika pelajar ke patut nadai ngira ari ni penatai sida.
Nengah bantu nya, ku iya dikearapka modal mensia nya jemah deka mai ubah ke besai ngagai komuniti.-TVS
