KUCHING, 2 Nov: Opis Kastam Diraja Malaysia(JKDM) Sarawak mujur nangkap siku individu pengudah nguji ngundan ai bisa enggau segerit ti dipelabaka berega RM3 juta.
Direktor JKDM Sarawak, Norizan Yahya madah, saspek ke deriba lori nya ditangkap seraban pegawai penerit adat ba Jalai Ekspressway Kuching-Samarahan urung pukul 2 lemai kena 22 Oktober tu tadi.
“Pengawa meresa enggau silik muatan lori kargo nya udah tetemuka sepenyampau 3,400,000 batang segerit bemacham chap enggau sepenyampau 2,376 liter ai bisa ke dipelabaka nadai lisin udah diangkut.
“Penyampau segerit enggau ai bisa nyengkaum duti enggau chukai dipelabaka manggai RM2,366,125, ” ku iya.
Iya madah munyi nya ba Aum Media di Stor Raban Penerit Adat, Opis Kastam Diraja Malaysia Kuching kena Hari Lima tu tadi.
Bela dirampas iya nya sebuah lori ti dipelabaka berega RM70 ribu.
Ku terang iya, raban sida benung bejalaika pengawa nyidi individu ke bisi kaul enggau kes nya.
Kes ditasat ba baruh seksyen 135 (1) (e) Akta Kastam 1967 ti nyema ditemu salah tau kena tinggang ukum jil enggau mata duit.-TVS
