LAWAS, 2 Nov: Pengawa numbuhka palan akuatik betikas Olimpik di Lawas deka mantu ngangkatka agi pemansang lumba akuatik lebih agi di sitak utara Sarawak, ku Datuk Amar Awang Tengah Ali Hasan.
Sapit Premier Sarawak nya madahka, penembu palan nya ila ukai semina meri perengkaguna ke manah ngagai peranak lokal tang nyadika pantar ngansah bakat nembiak dalam bidang lumba akuatik.
Berebak enggau nya sama, palan nya ku iya deka muka peluang ungkup pengawa ngatur pekit lumba akuatik dalam skala besai di Lawas.
“Tu digaga nitihka standard olimpik enggau perengkaguna tu dikearap ulih meri siti fasiliti ungkup kitai di Lawas tu enggau sitak Utara lebih agi Limbang Lawas dikena sida bejalaika latih enggau ke bukai.
“Kitai ngarap nengah pemisi pekit ila ulih diatur ba ditu,” ku iya.
Awang Tengah ke mega Kaban Kunsil Nengeri (ADUN) Bukit Sari mansutka jaku nya rambau bejadika Pekit Main Bol Tebuka Trofi Yb Datuk Amar Awang Tengah Ali Hassan Edisyen Keterubah 2024 di Kompleks Lumba Lawas lemai kemari.
Pekit nya dipasuk 30 tim ari Kuching, Limbang, Lawas, Sabah nyengkaum ari menua Brunei Darussalam.
Sama bisi datai nyempulang pejalai Awang Tengah, Kaban Parlimen Lawas Dato Henry Sum Agong sereta bala pemesai ke bukai.-TVS
