BETONG, 2 Nov: Pengawa ngemanahka infrastruktur pemun patut dipejalaika enggau lengkas di menua pesisir Sarawak nyengkaum di Bukit Saban.
Sapit Premier Sarawak, Datuk Amar Douglas Uggah Embas madah, pengawa ngemanahka infrastruktur baka jalai alun sereta ngangkatka penegap bekal kuasa karan beguna amat dikena mutar sekeda kandang endur ke suah napi penanggul.
“Kitai sedar perengka guna ti mimit sereta putus bekal karan nyadi siti penanggul ngagai peranak ba kandang menua tu.
“Nya alai, pengawa ngangkatmanah jalai alun enggau bekal kuasa karan patut dirumban enggau begunaka perambu ti silik sereta sukung ari opis menteri (KKDW),” ku iya.
Iya ke mega Kaban Kunsil Nengeri (DUN) Bukit Saban madah munyi nya ba Pengerami Tuai Begulai enggau Rayat di Rumah Panjai Enteri Lengkoi, Samu Ulu Paku ditu, sehari tu tadi.
Pengerami nya bisi digulu Sapit Menteri Besai ke mega Menteri Pemansang Tumpuk Pendiau enggau Wilayah (KKDW) Datuk Seri Dr Ahmad Zahid Hamidi.
Nitih ku Uggah, nengah inisiatif Malaysia Madani enggau perambu ekonomi ti disukung opis menteri ti bekaul, Sarawak ulih ngasaika pemansang ti lebih komprehensif.
“Rayat di menua pesisir bisi hak ngasaika perengka guna enggau infrastruktur ke sebaka enggau kandang mengeri,” ku iya.
Ku terang iya, taja pan diatu Sarawak diaku nyadi nengeri bepenatai pemisi tinggi ari Bank Dunya, tang pengeransing ngangkatka kualiti pengidup raban B40 sereta nentuka pemansang ti meruan nyadi pekara ti patut terus dipejalaika.
“Penyerakup tu nyadi penegap kitai di Sarawak lalu enggau rambai jaku ‘agi idup agi ngelaban’, kitai deka terus ransing ngemansangka nengeri tu,” ku iya.
Tandu iya, pengawa nya nyadi singkang strategik dikena ngenegapka penyerakup sereta nentuka pengelantang ba tetiap komuniti di Sarawak.-TVS
