SRI AMAN, 1 Okt: Raban pengajar di wilayah tu patut megai tanggungpenggawa enggau lebih dinamik sereta efisyen dalam napi jeman globalisasyen ba bidang pelajar ke majak kompleks enggau ngerembai maju diatu.
Sapit Menteri Pemansang Indu, Anak Mit Enggau Pengelantang Komuniti Sarawak, Datuk Mohd Razi Sitam madahka, pekara nya mega nuntut raban pengajar ngambika terus beinovasyen, kelimpah nentuka sida seruran bisi daya semekih.
“Dalam napi jeman globalisasyen, mayuh macham chabar nuntut kitai dikena bejalaika tanggungpengawa enggau lebih dinamik sereta efisyen.
“Dunya ke majak kompleks enggau ngerembai maju tu begunaka kitai ngambika terus beinovasyen sereta nentuka diri seruran bisi daya semekih.
“Nya alai, endang beguna bagi sesiku orang ngambika seruran chakah nambahka penemu enggau pengelandik, sekalika nengah belajar terus, latih pengelandik tauka nelebaka diri ngagai teknologi baru,” ku iya.
Mohd Razi mansutka pekara nya maya Pengerami Anugerah Perkhidmatan Cemerlang Renggat Opis Pelilih Betong 2023 diatur ba sebuah hotel tebilang ditu sehari tu tadi.
Ku iya, ulah tebuka ngagai ubah enggau penyikap dalam betapi sebarang pemar mega nyadi penyungkak dikena negapka daya semekih ngambika ulih ngangkatka tikas pemujur raban pengajar dalam organisasyen sida empu.
Tandu iya, enggau ngemeranka ulah tebuka nya, raban pengajar ulih nujah semua pemar senutuk enggau polisi sereta program pelajar ti udah diperambu opis menteri pelajar malaysia (KPM).-TVS
