KUCHING, 1 Okt: Perintah Sarawak dipinta numbuhka Opis Servis Kuarantin Enggau Peresa Sarawak (SAQIS) dikena nyamin pengelikun biosekuriti dalam nyaga pengerai mensia mayuh.
Menteri Industri Pemakai, Komoditi Enggau Pemansang Wilayah Sarawak, Datuk Sri Dr Stephen Rundi Utom madahka, opis ti diperambu nya deka ngesan tangkup pengawa ti sama baka opis Servis Kuarantin Enggau Peresa Malaysia (MAQIS) di Semenanjung.
Iya nerangka, penumbuh opis nya beguna dikena nentuka kualiti pemakai ti diterima rayat Sarawak nadai kamah laban kereban kimia sereta rachun perusak sechara lebih.
“Tusah amat, bisi entara sida (pemekal) ti enda merati silik enggau nadai tanggungpengawa enggau sayur ti dibai masuk nguna rachun sechara lebih sereta ke bukai.
“Lebuh sida ditangkap, kami neritka penalti ngagai sida tang barang (kereban mata) udah masuk, lalu berebak enggau nya kitai begunaka kuasa SAQIS.
“Kitai begunaka kerejasama semua raban, raban kastam, Opis Betanam Betupi, Opis Veterinar enggau Opis Pengerai mesti bekerejasama dikena ngurangka nya,”ku iya
Tandu iya, atur nya mega begunaka kerejasama ari mayuh bengkah ejensi sereta opis dikena ngurangka risiko penama produk pemakai ti ulih ngeruga nyawa sereta ke nguna mayuh kereban kimia enggau rachun.
Bedau lama tu tadi, media lokal ngeripotka senentang isu anggur import ‘shine muscat’ ke didawa ngembuan kelalu mayuh kereban kimia.
Dawa nya berengkah di thailand ari rentayan jaku tangkan rachun perusak Thailand (Thai-Pan), pengudah tetemuka mayuh sampel ti digumpul ngembuan kereban kimia ke ulih ngeruga nyawa ngelui taka maksimum ti dikemendarka.-TVS
