SRI AMAN, 1 Okt: Bisi 139 iku raban pengajar enggau staf sukung sekula primari enggau sekondari ba pelilih Betong sehari tu tadi udah nerima Anugerah Perkhidmatan Cemerlang (APC).
Pegawai Opis Pelajar Pelilih (PPD) Betong, Mohamad Lela Alamshah madah, anugerah nya endang kelai basa ngagai pemadas pengawa ke udah dipandang raban pengajar enggau staf sukung sekula ba pelilih Betong ngelama tu.
Ku iya, kerejasama rat mega patut digaga nyadi budaya gawa dalam genap raban pelajar lebuh ngereja sesebengkah pengawa tauka pemutus dikena nentuka pengelati dudi hari.
“Penyulut enggau kerejasama patut nyadi budaya genap raban dalam sebengkah pengawa enggau pemutus, dikena nyapai pemujur ke lebih lati dudi hari.
“Budaya kerejasama deka meransang servis ke lati ari raban pengajar enggau staf ke bukai ungkup pemaik pelajar ba sekula ti ngemeratka kerejasama dikena nyapai juluk besai organisasyen.
“Kerejasama tu mega deka ngenegapka kaul antara pengajar, staf enggau bala nembiak enggau mega apai indai kelimpah raban bekaul, nyadi pekara ke pemadu beguna kerejasama tegap dikena nentuka pengelati organisasyen sekula ke tegap,” ku iya.
Mohd Lela mansutka pekara nya maya Pengerami Anugerah Perkhidmatan Cemerlang Renggat Opis Pelilih Betong 2023 diatur ba sebuah hotel tebilang ditu sehari tu tadi.
Ku tandu iya, budaya kerejasama ke tegap beguna amat dikena enggau patut dikemeran dikena nentuka nembiak bulih pelajar ke meruan.
Nya alai, ku iya, nya mega deka nambahka pengasi dalam bejalaika program pelajar di sekula.-TVS
