SADONG JAYA, 1 Okt : Premier Sarawak Datuk Patinggi Tan Sri Abang Johari Tun Openg madahka, perintah Sarawak dalam timpuh lima taun tu deka nukar paip lama ai di serata Sarawak.
Ku iya madah, dikena ngemujurka insiatif nya perintah udah ngungkupka penyampau RM1.1 bilion dikena nukar semua paip lama.
“Reti tu tadi, dalam timpuh lima taun, penyampau RM200 juta tetiap taun sechara berenggat, berengkah ari ditu, ke Sibu, Miri nyentuk ke Limbang.
“Kitai deka nukar semua paip lama. Sistem tu ngena sistem digital,” ku iya.
Abang Johari mansutka penerang nya pengudah pengawa bejadika Masjid Darul Iman Pelilih Mit Sadong Jaya ditu, sehari tu tadi.
Ku terang iya, perintah Sarawak deka terus ngerembaika pemansang pemun di serata Sarawak berindik ari asil penatai pemisi Sarawak majak nambah ninting taun.
Ku iya madah, perintah deka mantu nambahka asil penatai pemisi ruang bilik perayat Sarawak, sereta siti inisiatif ke diberi perintah dikena ngemujurka juluk nya, meri pelajar tinggi pechuma ngagai anak Sarawak di Palan Pelajar Tinggi (IPT) berengkah taun 2026.
Tandu iya, anak sida ti mujur pansut ari universiti bisi peluang bulih pengawa ke manah, ti tau mantu nambahka asil penatai pemisi ruang bilik.-TVS
