KUCHING, 28 Okt: Sarawak dipeda bisi daya ulih matak pemeranak puku ari menua luar dikena nyukung wilayah tu nengah bidang lumba.
Premier Sarawak Datuk Patinggi Tan Sri Abang Johari Tun Openg madahka pengulih tu bepelasarka asil Sarawak dalam ngatur Lumba Malaysia (SUKMAuk) 2024 bedau lama ka udah.
“Aku meda belanja ti dipansutka kitai nya alai kitai beranakka puku ungkup nembiak kitai ngambika sida nembuan mayuh peneleba ba pengawa.
“Siti ari nya pengulih diri empu lalu kedua kitai mesti bisi utai ditaga lalu bebendar gawa dikena ngulihka taga nya.
“Nya alai pengawa beranakka puku tu chukup beguna dikena nempa nembiak kitai.
“Aku meda prestasi sida endang manah. Enti ba lumba iya manah ba bidang bukai iya tentu manah laban iya bisi sumber sereta insentif dikena nyapai pemujur,” ku iya.
Abang Johari mansutka jaku nya ba Pengerami Makai Lemai Apresiasyen SUKMA Ke-21 2024 ba Palan Konvensyen Borneo Kuching (BCCK), ditu kemari.
Ku tandu Abang Johari madah pengawa ngatur SUKMA ngayanka pengulih Sarawak dalam bejalaika pengawa nyadi tuai rumah taja enda bepelasarka gintir ka patut.
Udah nya, ku iya Sarawak mega deka nyadi pengatur Lumba SEA 2027 enggau kerejasama ti ngempung semua atlit ari menua Asia Tenggara.
“Semua orang bejaku senentang pengawa bejadika Datuk Seri Anwar pan iya ba menua luar iya meda utai ke nyadi.
“Lebuh kitai bejadika SUKMA lalu bisi mega timbal orang madah manah agi ari Paris Olimpik.
“Nya alai kitai udah bisi standard enggau digital iya, merindang enggau budaya ti ngayanka penyerakup entara semua kitai.
Ba pengerami nya Abang Johari bisi bejadika bup ‘Road To Glory SUKMA Xx1 Sarawak’ ti ngayanka pejalai Lumba Malaysia (SUKMA) Sarawak ke-21 2024.-TVS
