DEBAK, 28 Okt: Bisi 39 buah Projek Transformasyen Menua Pesisir (RTP) Taun 2025 di sitak Kunsil Nengeri (DUN) Saribas deka dikemujur nengah agih belanja RM5 juta.
Kaban Kunsil Nengeri (ADUN) Saribas Datuk Mohammad Razi Sitam madah, tebal agi agih belanja nya deka dikena ngemanah sistem parit ba genturung pendiau asal di sitak nya.
“Fokus kitai iya nya ungkup infra ba genturung pendiau ke patut dirumban baka jalai, arung, parit dikena mutar penanggul (ampuh bah) ba genturung pendiau.
“Taun 2025 kitai mayuh fokus ngagai pengawa ngemanah sistem parit ba semua genturung pendiau laban semua jalai besai ngelawa genturung pendiau tu udah apus ditar.
“Diatu kitai semina patut ngemanah sistem parit lebih agi ba genturung pendiau asal,” ku iya.
Iya mansutka pekara nya rambau ngulu sebengkah program diatur ba SMK Saribas empai lama.
Nangkan ke nya, ku pekara nya nyadi fokus iya serak tu beduduk ari semua rumah tauka genturung pendiau ba sitak DUN Saribas udah apus disikap enggau perengkaguna pemun baka jalai raya enggau ke bukai.
Pia mega iya madah, peminta ungkup projek pemansang fizikal ba sekeda sekula ba sitak nya bela udah dipasuk dalam rintai projek ti deka dikemujur taun baru.-TVS
