DEBAK, 28 Okt: Pengawa ngatur Pengerami Pedagang enggau Pemakai Debak (FKFD) 2024 ulih nyadi pantar ungkup pedagang mit ngelakuka produk, ku Datuk Mohd Razi Sitam.
Sapit Menteri Pemansang Indu, Anak Mit enggau Pengelantang Komuniti Sarawak madah, nengah pengerami nya mega ulih ngerichahka agi aktiviti sosio ekonomi peranak ba sitak Debak.
Nya alai, iya ngarapka kerejasama enggau Kaunsil Makit Betanam Betupi Perintah Besai (FAMA) Bagi Menua Betong deka mengkang tegap ngambika ulih ngatur program ke sebaka dudi hari.
“Kitai ngarapka ulih terus bekerejasama enggau FAMA ungkup dudi hari.
“Tu keterubah iya kitai nguna palan entepan kerita ke besai tu endur ngatur program ke baka tu lalu aku meda taba tu (entepan kerita) chukup engkeman alai neruska program ke sabaka nyengkaum Pesta Debak enggau Pasar Malam.
“Nya alai, aku merambu deka ngidupka baru Pasar Malam ke udah diketu ketegal Covid-19 suba,” ku iya.
Razi ke mega ADUN Saribas mansutka penerang nya pengudah bejadika pengawa nutup Pengerami Pedagang enggau Pemakai Debak 2024, empai lama.
Beduduk ari nya iya minta pengatur program ungkup maya ti deka datai patut ngemanah agi perengkaguna ke udah bisi ungkup pengelantang raban pedagang enggau temuai ke datai.
Program ti keterubah iya diatur nya mujur tegumpulka asil bejual manggai RM14,000 sereta matak lebih 20,000 iku temuai sepanjai program ke berengkah 25 nyentuk 27 Oktober tu tadi.-TVS
