KUCHING, 27 Okt: Premier Sarawak Datuk Patinggi Tan Sri Abang Johari Tun Openg madahka, Projek Neu Pendington ti dikemansangka Uda Holdings Berhad (UDA) bekerejasama enggau Opis Pemansang Ekonomi Sarawak (SEDC) nyadi siti endur ke strategik.
Ku iya madah, pemansang projek nya mungkur endur retanah nyengkaum hotel, palan bebelika barang, kondominium sereta endur berumah ti dijangka disambung terus enggau stesyen Transit Arus Autonomi (ART).
“Pemansang ART tu deka disambung ngagai endur berumah di Petra Jaya nyengkaum Kompleks Lumba enggau Main Sarawak enggau jalai nuju Kota Samarahan.
“Sitak tu (Neu Pendington) deka bisi dua jalai ke Samarahan.
“Keterubah, jalai ke dikemisi kitai diatu terus nuju endur nya enggau kedua nengah Sejingkat pengudah tembu Jematan Sejingkat ti deka nyambung endur ba seberai Pending nuju jalai baru ke digaga ke Universiti Malaysia Sarawak (UNIMAS),” ku iya.
Abang Johari mansutka jaku nya rambau bejadika program nutup Karnival UDA 2024 Sarawak, ba taba projek Neu Pendington, ditu pagi tadi.
Berebak enggau nya, Abang Johari nerangka, pemisi jematan nya jemah deka ngemudahka uda bejalaika pengawa ngemansangka UNIMAS ti nyadi endur kedua di Sarawak.
“Sida UNIMAS bisi datai ngelawa aku mai keretas perambu.
“Nya alai, aku madahka sida neruska kerejasama enggau UDA ngemansangka endur di UNIMAS.
“Endur tu mega semak sepital UNIMAS ke baru sereta bisi daya meri perengkaguna ke strategik ngagai UDA,” ku iya.
Beduduk ari nya, iya madahka pemansang strategik ti dipejalaika ba endur nya deka meri empas ke manah ngagai penambah ekonomi, tebal agi di mengeri Kuching.-TVS
