KUCHING, 27 Okt: Parti Rayat Sarawak (PRS) ngarap sekeda kerusi Kunsil Nengeri (DUN) Sarawak ke baru bisi diberi ngagai parti nya ke mega sebagi ari komponen Gabungan Parti Sarawak (GPS).
Presiden iya, Datuk Joseph Salang Gandum madah, atur nambahka kerusi baru lebih agi ungkup sitak menua pesisir beguna amat berindik ari maya diatu konstitusyen parlimen enggau nengeri ti diarika PRS chukup besai.
Iya nyemetak madah, pekara nya mega meri pemar dalam meri servis ke rayat nyengkaum bejalaika projek pemansang di menua pesisir ngambika setikas enggau di mengeri.
“Maya diatu, konstitusyen menua pesisir chukup besai enggau enda bulih agih ke betul setipak enggau agih ungkup peranak di mengeri.
“Kami enda minta semua kerusi ke baru deka ditumbuhka nya diberi ngagai PRS tang deka kerusi ke baru ti ngarika komuniti di menua pesisir ngambika projek tauka servis ke bekaul ulih datai enggau muntang agi,”ku iya.
Iya mansutka jaku nya dirandau pemberita TVS nyerumba Pengerami Makai Lemai Penumbuh Parti Rayat Sarawak Ke-20 Taun di sebuah hotel tebilang ditu malam kemari.
Diatu , PRS semina bisi ngempu 12 kerusi DUN iya nya Balai Ringin, Bukit Begunan, Batang Ai, Ngemah, Tamin, Kakus, Pelagus, Bukit Goram, Baleh, Belaga, Murum enggau Samalaju.
Udah nya, ungkup sitak Parlimen kerusi asal ke dipenggi PRS iya nya Sri Aman, Lubok Antu, Julau , Kanowit, Selangau enggau Hulu Rajang.
Dulu agi ari nya, ba jaku iya bejadika pengerami nya Salang nyemetak madah diri deka terus ngiring PRS nyentuk Aum Besai Pengari Tiga Taun Sekali (TDC) parti nya ti ditaga diatur taun baru.
Nya alai, Salang ngelalau bala tuai parti nya ti bisi ati deka nampung pengawa iya nyadi presiden patut nyikap diri berengkah ari diatu seraya nangkup pengawa nya ila enggau ati lurus baka ke udah digaga iya.
Beserimbai enggau pengerami nya mega, iya bisi nangkan semua kaban parti nya patut belajar ari pekara ke kala ditempuh sida, lalu ngarapka semua tuai parti terus ngemudi PRS enggau lebih manah dudi hari.-TVS
