DEBAK, 27 Okt: Pengawa ngatur Program Literasi Penemu Pekara Wang Enggau Scammer Alert ungkup komuniti lebih agi ba nembiak sekula beguna bendar dikena meri penyedar bekaul penyalah siber enggau prosedur ngatur pekara wang enggau manah.
Sapit Menteri Pemansang Orang Indu, Nembiak Mit Enggau Komuniti Sarawak Datuk Mohammad Razi Sitam madah, inisiatif nya senutuk enggau komitmen perintah dikena mutarka isu penyalah siber bekaul ulah nipu nengah tali arus.
“Program baka penemu pekara wang enggau ‘scammer alert’ tu beguna bendar ti nyadi siti ari konsep kimpin dikena meri penyedar ngagai komuniti lebih agi raban nembiak, ukai semina orang besai tuai aja, tang rebak baru, baka nembiak sekula ti deka pansut sekula lalu masuk ngagai dunya kereja tauka bidang pelajar ba renggat universiti.
“Nyadi sida tu begunaka pemereti ati ngatur pekara wang enggau manah sereta mega isu ti bekaul enggau ulah nipu nengah siber tu,” ku iya.
Razi ke mega ADUN Saribas madah munyi nya lebuh dirandau pemberita pengudah Program Literasi Wang 2024 Begulai Enggau Agrobank ti nungkatka rambai jaku “Celik Wang Dan Scammer Alert” diatur ba Sekula Sekondari (SMK) Saribas, kemari.
Tandu iya, kes penyalah siber entara 14 pekara ti dikemeratka sereta diputarka opis menteri iya nengah Kaunsil Pemansang Rama (MPS) ungkup pengelantang rayat.
Nangkan ke nya, iya ngarapka program penyedar nya mega deka diatur institusyen wang bukai jemah ila, lebih agi di Sarawak. -TVS
