SARATOK, 27 Okt: Tim Todak Berjaya mujur ngetanka gelar Raja Sungai Krian 2024 sereta mai pulai perais mata duit RM15, 000 pengudah menang ba achara Bidar 30 Pengayuh Lelaki Regata Krian 2024 ke diatur ba Tebing Sungai Krian ditu lemai tadi.
Menijar tim Nur Hazwani Kasdi madah, pemujur nya diasaika perais ke chukup besai reti ngagai iya empu ke nyadi menijar laban udah bebendar mai raban tim belatih kenyau empat bulan ke udah.
“Keterubah iya, Puji Tuhan laban mujur ngetanka gelar champion.
“Enda nyangka ulih ga mujur berekat belatih empat bulan ke udah.
“Taun tu tim kami diarika pengayuh ke datai ari empat pelilih iya nya Saratok, Mukah, Tuie enggau mega Ladong.
“Gaga amat ati arapka taun bukai betemu baru mih,” ku iya.
Iya mansutka jaku timbal nya maya dirandau pembudah Pengawa Nyuaka Perais Ngagai Balai Pemenang ba Panggau Besai Regata Krian 2024 ba Tebing Sungai Krian ditu, lemai tadi.
Ku terang iya, raban sida tetap deka terus belatih udah tu awakka gelar Raja Sungai ungkup pekit ti deka datai agi ulih diempu sida.
Ngelansa pasal Regata Sarawak ke deka datai iya madah tim Todak Berjaya enda ngeletak saran ke tinggi tang deka meda tim nya ulih manggaika nama diri ba penuduk lima pemadu manah ba kategori Bidar 30 Pengayuh Lelaki.
Kelimpah ari gelar Raja Sungai, tim Todak Berjaya mega menang sekeda achara bukai ba hari kepenudi pekit Regata Krian 2024 iya nya champion kategori Bidar 10 Pengayuh, Bidar 15 Pengayuh, Bidar 20 Pengayuh enggau Bidar 25 Pengayuh.
Ke penerang, bisi enam buah tim bepekit ngerebut gelar Raja Sungai Krian 2024 serak tu lalu bisi 13 buah perau ngambi bagi
Antara tim nya kelimpah ari Todak Berjaya iya nya Putera Todak, Pancar Burak Sakti, Cahaya Helang Tasik, Lanun Dinara Cut enggau Seri Bunga.
Lumur dua dipenggi tim Putera Todak ke mai pulai perais RM9,000 ditangkan lumur tiga tim Pancar Burak Sakti nerima perais RM4,000.
Semua perais bala pemenang disuaka Kaban Kunsil Nengeri (ADUN) Krian, Friday Belik ke nyadi patron pekit serak tu.-TVS
