KUCHING, 26 Okt: Sarawak diatu benung nyerungkai puncha kuasa beresi baru nengah chara ngena teknologi ‘Ocean Thermal Energy Conversion’ (OTEC) ba kandang tasik Miri ti ulih ngasilka kuasa ti enda putus nengah bida timparicha angat atas tasik enggau timparicha chelap dalam tasik.
Premier Sarawak, Datuk Patinggi Tan Sri Abang Johari Tun Openg madahka inisiatif nya senutuk enggau pengawa ngasilka kuasa nengah OTEC ti ngembuan potensyel ngasilka lebih 10 GW (Gigawatt) kuasa ungkup wilayah tu.
“Sarawak ti ba pelantar benua ngembuan tasik ti enda entu dalam. Reti nya, ba tikas tasik nya, timparicha angat ba atas tasik enggau timparicha ti chelap ba baruh tasik endang ulih ngasilka kuasa baru ari tasik.
“Tu nyangka deka digaga ba tasik Miri. Enti tasik Miri ulih ngeluarka kuasa baru,nyadi tu ulih ngeluarka lebih ari 10 GW,” ku iya.
Abang Johari mansutka jaku nya rambau Pengerami Anugerah Konvensyen Inovasyen Servis Gawa Perintah Sarawak (SCSICA) 2024, ditu kemari.
Nangkan ke nya, abang johari madahka, pekara nya nyadi sebagi ari chara dikena matak pemeranak puku ari menua luar ngambika ulih meranakka puku di Sarawak seraya ulih nyungkak ekonomi nengeri.
“Tu deka nyungkak ekonomi kitai sereta meri pemaik ngagai penatai pemisi nengeri tu seraya ulih ngadaka peluang pengereja pengawa bepenatai pemisi tinggi. Enti kitai meri penatai pemisi ke tinggi ngagai sektor peribit, rayat deka bulih penatai pemisi ke mayuh agi, ” ku iya. -TVS
