MARUDI, 26 Okt: Urung 525 iku sida ke beumur 16 taun ke atas ari raban B40 di sitak Kunsil Nengeri (DUN) Marudi udah nerima lisin deriba kelas B2 (motosikal) di baruh Program MyLesen B2 Renggat Marudi diatur ba Dewan Masyarakat Beluru.
Pengerami nya bela digulu Sapit Menteri Pengerai Mensia Mayuh, Pengawa Berumah enggau Perintah Lokal ke mega Kaban Kunsil Nengeri (ADUN) Marudi, Datuk Dr. Penguang Manggil.
Maya bejaku ba pengerami nya, ku iya inisiatif tu endang siti pengawa perintah dikena ngajar enggau meri penyedar ngagai bala penerima lisin awakka seruran nitihka undang-undang jalai raya.
“Ulah ngemeranka pengelikun ba jalai raya chukup beguna dikena nentuka pengelikun penguna empu ba jalai raya.
“Nengah program tu ulih meri penerang ngagai komuniti senentang atur maya ba jalai raya sereta nempa deriba motosikal ke sikar sereta likun,” ku iya.
Sama bisi datai Direktor Opis Pengangkut Darat Sarawak, Norizan Jili, Tuai Pampang JPJ Miri, Fifi Suhesty Asmuni, Pegawai Opis Pelilih Beluru, Charles Aloysius Lisu enggau Tuai Polis Pelilih Marudi, DSP Aizan Mohd Jamil. – TVS
