KAPIT, 26 Okt: Perintah Sarawak ngemeratka langkar rapat ti menatika pemaik di selampur menua tu nengah chara nempa kerejasama ti rat enggau semua ejensi ke nyadi kaban strategik.
ADUN Katibas, Lidam Assan madahka, perintah Sarawak ngesan tangkup pengawa ngelangkar kuing tuju, strategi sereta inisiatif agenda nasional Malaysia gerai tauka dikumbai (ANMS) ti ngaul sektor peribit, sereta gerempung ukai dikuasa perintah (NGO).
Nampung berita Unit Komunikasyen Perintah Sarawak (UKAS), iya nyemetak madahka, sektor peribit enggau NGO bela bejalaika tanggungpengawa ngemujurka strategi ti dilangkar nya ungkup pemaik rayat Malaysia.
“Juluk program tu iya nya deka negapka pengawa ngelakuka budaya pengidup ti bepengerai, negapka servis pengelantang sereta pengerai,” ku iya.
Lidam nerangka, juluk program tu iya nya deka negapka pengawa ngelakuka budaya pengidup ti bepengerai, negapka servis pengelantang sereta pengerai, nyaga pengerai diri sereta nambahka pemereti senentang pemeresi rampa menua.
Iya mega ngarapka nengah ANMS ulih meransang komuniti lokal ngemeratka Standard Atur Pengawa (SOP) ke udah ditetapka.
“Dikena nentuka literasi pengerai rayat Malaysia ulih ditambah, program pemansang daya Ejen Pengerai Komuniti (MyCHAMPION) mesti ditegapka,” ku iya.
Tandu iya, perintah nengeri mega udah ngaga pemutus deka numbuhka pelasar literasi pengerai nasional nengah sekeda inisiatif ti deka dipejalaika nyengkaum ngatur program pemereti nyaga pengerai ke suah diatur nengah mayuh macham pelasar.
Nya alai, Lidam ngembuan pengarap ke besai program baka nya meri pemaik ngagai perayat ke mendam di ulu sungai.
Iya mansutka jaku nya rambau ngulu Program Agenda Nasional Malaysia Sihat (ANMS) 2024 ba Rh Radiah Nanga Sesibau, Katibas, Hari Empat tu tadi.-TVS
