PETALING JAYA, 26 Okt: Jaguh powerlifting menua Bonnie Bunyau Gustin malam tadi mujur nyadi penerima perais pemadu besai ba Pengerami Nyuaka Skim Perais Pemujur Lumba (SHAKAM) ungkup Pekit Lumba Paralimpik Paris 2024.
Pemujur iya ngetanka emas ba kategori lelaki 72 kilogram (kg) di Paris 2024 ngujungka atlit beumur 25 taun nya nerima upah ke besai RM1 juta disempulang insentif tambah penyampau RM20,000 bekau ari jalai mechah rikod dunya ke dipenggi iya empu nengah rikod baru 232kg.
Kelimpah madamka rikod dunya lama iya empu 231kg ti ditempa ba Pekit Powerlifting Para Dunya 2023 di Dubai, penyampau pemerat besi diangkat iya ba Perancis mega nempa rikod baru ungkup Pekit Paralimpik, madamka rikod lama iya empu iya nya 228kg ke dirikod maya 2020 di Tokyo, Jipun.
Bonnie ngasaika perais ke diterima iya nya chukup besai reti laban bepekit ngelaban pemedis ba bahu kiba iya dikena nentuka emas mengkang diempu iya ba penatai kedua kali ba kelang Paralimpik.
“Aku ngasaika basa ke diberi malam tu chukup besai reti laban di Paris 2024 aku benung pedis maya ngangkatka pemerat. Nyadi pemedis nya tebalas ba aku,” ku iya maya pengudah Pengerami Nyuaka Shakam dikemujurka Menteri Nembiak enggau Lumba Hannah Yeoh ditu.
Bela nerima perais malam nya pemenang midul emas achara badminton solo lelaki SU5 Cheah Liek Hou (RM1 juta) ditangkan dua jaguh olahraga para menua iya nya pemenang midul pirak perejuk jauh lelaki T20 Datuk Abdul Latif Romly enggau pemenang midul pirak nikauka peluru lelaki F20, Muhammad Ziyad Zolkefli, ke bela nerima RM300,000.
Siku agi atlit olahraga para menua Eddy Bernard ke bulih midul engkeraju ba achara 100m lelaki T44 nerima RM100,000.
Kelimpah ari nya, tiga pengari badminton menua bela mai pulai perais RM100,000 siku pengudah menang midul engkeraju ba Lumba Olimpik 2024 iya nya beregu chamion lelaki dunya 2022 Aaron Chia-Soh Wooi enggau pemain solo profesional Lee Zii Jia.
Dulu ari nya, Hannah ba jaku iya nangkan bala atlit patut terus ngemaruhka diri lalu anang kelalu ngerunding perais aja maya belatih tauka bepekit.
“Aku ngarap perais SHAKAM deka terus nyadi peransang ngagai semua atlit menua,” ku iya. – TVS
