KUCHING, 25 Okt: Dunya diatu benung betapi enggau dua krisis ti nyadi penanggul, sereta ulih ngeruga idup mensia jemah, ku Datuk Patinggi Tan Sri Abang Johari Tun Openg.
Premier Sarawak nya madahka, isu ti nyadi penanggul ke balat ngirauka ati iya nya ubah klimate enggau sekuriti pemakai.
“Enti gaya klimate kitai kelalu ekstrem, nadai mensia ulih selamat laban enti kitai meda diatu, ampuh bah suah nyadi enggau kitai enda ulih nyadang kemaya penusah ngenyit nya deka nyadi.”
“Pekara tu meri empas ngagai bekal pemakai. Enti ampuh bah tauka kemarau , pedis kitai deka betanam betupi,” ku iya.
Abang Johari madah munyi nya rambau Pengerami Nutup Program Latih Ungkup Raban Pemberita Sarawak ke diatur ditu kemari.
Ku terang iya, Sarawak diatu ngesan tangkup pengawa dalam mutarka dua penanggul nya.
“Di Sarawak, kitai ngembuan puncha ke chukup. Kitai ngembuan puncha ai dikena nyungkak kuasa beresi sereta puncha panchar mata panas enggau pegung dikena ngasilka kuasa solar.”
“Enti kitai bisi kuasa lebih, kitai ulih bekunsi enggau menua pengimbai baka Singapore sereta Indonesia,” ku iya.
Kelimpah ari nya, Program Latih Ungkup Raban Pemberita Sarawak ti berengkah dipejalaika kenyau Hari Dua tu tadi, ngemataka bisi 150 iku pemekuh media nitihka kus ti diatur MPI baka kus Pemberita Gambar, ‘Workshop On Journalism In A New Media World’ enggau Kus Pemberita Data 2.0: Sentimen Analisis.-TVS
