DEBAK, 25 Okt: Perintah Sarawak udah ngemendarka ungkup penyampau RM10 juta nengah Ejensi Pemansang Bagi Menua Betong (BDDA) dikena nirika Wisma Pengintu Pengelantang Komuniti (WKK) ba pelilih Debak.
Sapit Menteri Pemansang Pengintu Pengelantang Komuniti Sarawak, Datuk Mohammad Razi Sitam madahka pemisi begunan wisma nya ila deka endur semua ejensi ba Baruh Opis Menteri
Pemansang Orang Indu, Nembiak Enggau Pengelantang Komuniti baka palan aktiviti ungkup raban lunggar umur (PAWE) enggau SeDidik.
“Projek nya udah dikemendarka ba baruh BDDA..kos iya nya RM10 juta.
“Enti berengkah ila tu bepanggai ba konsultan lalu sepengudah nyiri konsultan, nyendia langkar, enggau ke bukai lalu langkar begunan pan kitai ngarapka ulih bejalai enggau lanchar iya berengkah setaun dua taun ke deka datai lalu ngarapka mujur,” ku iya.
Razi ke mega ADUN Saribas mansutka pekara nya maya ngabas taba Projek Ngaga Wisma Pengelantang Komuniti (WKK) ba Palan Servis ADUN Saribas sehari tu tadi.
Ku tandu iya, wisma nya deka meri pangka ti positif lebih agi ba pengani Debak ke alai palan iya bedampih engau Skim Ngemesaika Genturung Pendiau Melayu (SPK) Debak renggat keterubah ba Jalai Surie.
Nangkan ke nya ku iya madah, projek ba baruh patau Opis Kereja Raya bagi menua Betong nyadi ejensi pengatur nya deka berengkah sebarang maya sepengudah proses bekaul nyiri konsultan enggau langkar (tempa tukuh) tembu.-TVS
