Viu, sebengkah aplikasi OTT tebilang ba rantau tu , udah bulih 42 konten ari TVS (TV Sarawak), lalu ngujungka konten ke udah bisi ba Sarawak digempuru sereta dipilih ngambika muntang dipeda penguna Viu.
Nengah sempekat ti dikemujurka MyContent Distribution (MCD) tu, mayuh program ke udah dipilih ari Sarawak diatu udah ulih dipeda mensia mayuh.
MCD ngempu tanggungpengawa berat dalam nentuka pemujur sempekat tu, muka peluang ke lebih besai.
Asil pengawa tu mega muka peluang ngagai penengkebang konten kategori khas Sarawak, seraya ngujungka penguna ulih meda pengaya pesaka budaya enggau seni Sarawak.
Sempekat belisin tu kebendar ungkup timpuh setaun lalu penguna ulih meda program dikerindu sida ari TVS nengah kategori ‘Khas Dari Sarawak Bumi Kenyalang’ di Viu.
Direktor Pengatur MyContent Distribution, Lyn Nasihin madah, raban sida temegah ati ulih bekerejasama enggau Viu sereta TVS dalam ngangkatka kisah tebilang ari Sarawak.
“Bemacham konten manah diatu bisi ba Viu mandangka bakat enggau kreativiti ari rantau tu, lalu kami gagit meda program tu ulih nerima pengaku ke patut. Kerejasama tu mega netapka kelai sukat ke baru dalam pengawa ngerembaika konten ba rantau tu,” ku iya.
Pengawa tu nyendiaka bemacham program, nyengkaum dokumentari ke kala menang anugerah baka ‘Guardians of the Shore’ sereta siri lokal tebilang iya nya Ram Ram Rep enggau sitkom dalam jaku Iban, Tembawai Kanyuk. Semua kisah tu ulih dipeda bala peminat ke apin meda sebedau tu.
Siti ari pejuluk besai, Guardians of the Shore, ditempa Mark Nyambang, ngangkatka pengawa pemungkal Sarawak dalam nyaga marin, lebih agi ngaga benteng tukun tiru pemadu panjai di dunya.
Dokumentari tu nerima pengaku antarabansa, nerima Anugerah Engkeraju ba Content Asia Awards 2024 enggau Anugerah Khas Merit di Kuala Lumpur International Eco Film Festival 2023.
Siti agi siri dikerindu peminat, Ram Ram Rep, ditempa Josh Nawan, iya nya drama psikologi ke ngundan bemacham jalai jerita kelimpah gaya kelulu ke manah. Pia mega, Tembawai Kanyuk, sitkom keterubah jaku Iban, udah matak ati mensia mayuh bekaul enggau buah penemu jenaka pasal pengidup ba rumah panjai Sarawak, ngemeratka pemesai guna penyerakup lebuh begulai enggau mayuh orang.
Sapit Chairman Eksekutif ke mega Tuai Pegawai Eksekutif TVSÂ Kushairi Abang madah, kerejasama enggau Viu tu endang sejarah besai ngagai industri kreatif Sarawak.
“Tu keterubah iya, program lokal diatu duduk sebaris enggau konten bukai ke manah, meri pengasai atu ke baru ngagai orang meda sekalika nya ba sada nyawa, budaya enggau mega bemacham pekara ari rantau tu.
“Tu endang peluang pemadu manah ngasauh raban orang ke meda ngasai diri lebih semak enggau kisah sereta budaya Sarawak,” ku iya.-TVS
