TATAU, 24 Okt: Tuai Seksyen Pengatur Baya, Begian Neritka Atur Enggau Nyaga Sarawak Forestry Corporation (SFC), Dr Mohd Izwan Zulaini nengah sebengkah program licha pasal baya ke diatur ditu madahka, komuniti ti ngasaika pengelikun diri tekeruga, nadai salah nyema sida deka munuh baya nya.
Ku terang iya, mensia mayuh tau enda ibuh minta lisin laban sida dikemendar munuh baya nya ngena senyata ke dikembuan sida empu.
Nya alai iya bisi ngelalau mensia mayuh patut seruran bejimat laban antara pengawa ke suah dikereja orang siku-siku ke ngujungka sida mayuh kena tagup baya iya nya baka benung mandi ba sungai sereta berikan.
“Kes ditagup baya tu bisi nyadi ba kandang endur ke nadai bekal ai (kena mandi).
“Enti bisi alternatif (chara bukai) dikena perayat tu mandi, engka ulih ngurangka kes ditagup baya nyadi, ngambika enda nurun ke sungai,” ku iya.
Mohd Izwan ke mega siku tebangkar pasal baya nerangka mayuh kes kena tagup baya ngaul nembiak ke beumur baruh 20 taun tauka 10 taun ke baruh iya nya maya sida kemisi sekula tauka ujung minggu.
Nya alai, iya ngelalau apai indai anang sesekali ngelakka bala anak ke agi mit nurun kediri mandi ba sungai.
“Enti nyema baya tauka jelu siga bukai ditemu ulih ngeruga pengelikun kita, kita ulih (dikemendarka) munuh baya nya sereta enda ibuh minta lisin.
“Taja pia, kita mesti nemu nama bida ngeruga pengelikun enggau ngasu baya.
“Ambika chunto, lebuh ba sebelah sungai bisi baya semak deka nagup kita, kita ulih munuh baya nya ngena senyata ke dipegai kita maya nya. Nya (nadai salah) ukai siti penyalah,” ku iya.
Dulu ari nya, program licha 3M bisi diatur dalam dua renggat iya nya kena 22 enggau 23 Oktober tu tadi bisi digulu urung 150 iku penyereta datai ari Batang Anap, Sungai Annau sereta sekeda ejensi ari pelilih Tatau.-TVS
