BETONG, 24 Okt: Kelimpah mantu negapka tusun pengawa atur meri insentif sepenyampau RM5,000 ngagai Komiti Pemansag enggau Pengelikun Genturung Pendiau (JKKK) diperati ulih dikena ngemujur sebarang aktiviti bekaul enggau pemansang komuniti.
Penulung Pegawai Administrasyen Opis Pelilih Betong, Christina Peter madahka, pemisi insentif nya deka mantu ngemujurka sebarang aktiviti bekaul ke bemaik peranak rumah panjai.
“Insentif tu iya nya agih belanja ari Perintah Besai nengah Opis Menteri Pemansang Tumpuk Pendiau enggau Wilayah (KKDW) ngagai Perintah Sarawak enggau tuju besai iya nya dikena negapka tusun pengawa JKKK.
“Kelimpah ngembuan fungsyen dikena nentuka tetiap program tauka aktiviti ti ulih meri pemaik, ke udah diperambu bejalai lanchar,” ku iya.
Christina mansutka penerang nya pengudah meri licha pasal Insentif Administrasyen JKKK Pelilih Betong Renggat Keterubah diatur ditu, empai lama.
Kelimpah ari nya, ku iya pemeri insentif nya mega ulih nyadi peransang ngagai tetiap JKKK ke bekaul dikena bejalaika program pemansang baka ekonomi, pengelikun, rama sereta ke bukai nyengkaum aktiviti bekaul pemanah genturung pendiau.
Ke penerang bisi 89 peminta insentif administrasyen JKKK di Pelilih Betong.
Pengawa meri insentif nya endang senutuk enggau juluk perintah besai enggau perintah nengeri ti keran deka meda semua rayat ngasaika pengelantang.-TVS
