BETONG, 24 Okt: Tebal agi bala chairman Komiti Pemansang enggau Pengelikun Genturung Pendiau (JKKK) madah diri chukup gaga enggau insentif JKKK ke bisi diungkupka perintah besai.
Ku sida, insentif JKKK nya ulih mantu ngenegapka agi program pemansang ba rumah panjai tauka genturung pendiau sida dudi hari.
Ba penemu Chairman JKKK Rumah Panjai Stambak Ili, Tr Reynold Jaya Mula madah, insentif nya udah mayuh mantu enggau ngujung iya sereta sida serumah ulih bebelika kereban rumah dikena program beripai meresi kandang rumah panjai.
“Ba penemu aku insentif tusun pengawa tu chukup manah pulai ngagai rumah panjai laban siti agi laban utai tu endang iya nulung nyukung rumah panjai ngaduka pengawa baka reti enggi aku dikena ngemanah agi pendiau rumah panjai.
“Nyadi kami serumah beripai ngereja pengawa ngena agih belanja nya tadi,” ku iya maya dirandau pemberita pengudah tembu Program Licha pasal Insentif Administrasyen JKKK Pelilih Betong Renggat Keterubah diatur ditu, empai lama.
Udah nya, ba penemu Chairman Rumah Panjai Pedanom, Tr Mergi Sendar madahka, iya meri terima kasih ngagai perintah besai enggau perintah nengeri laban negah insentif nya ulih mantu sida serumah ngatur aktiviti ke bekaul.
“Bantu tu peda aku chukup manah RM5,000 tu penyampau ke mayuh ba kitai taja pan rega barang udah mar.
“Enti baka agi suba bisi endar utai baka tu. Nyadi serak tu aku meri besai terima kasih ngagai perintah ke udah meri kami insentif ke nyampau tu,”ku iya.-TVS
