KUALA LUMPUR, 24 Okt: Opis Menteri Kereja Raya naka ulih ngangkatka kualiti Infrastruktur menua nengah agih belanja besai ke diberi nengah Bajet 2025.
Menteri Kereja Raya Datuk Seri Alexander Nanta Linggi madah, ari semua penyampau RM10.35 bilion ke udah dipadah, lebih RM9 bilion deka dikena ngatur pemansang.
“Penerang Bajet ke ngaul Opis Menteri Kereja Raya enggau penyampau penuh RM10.35 bilion berupai mandangka penyiru perintah dikena ngangkatka kualiti infrastruktur menua ungkup pengelantang enggau pengelikun rayat.
“Ngambika lebih nyata ari RM10.35 bilion tu kitai bulih lebih RM9 bilion ungkup pemansang. Nyadi aku dipadahka tu pemadu besai udah diulih kitai,” ku iya.
Iya mansutka pekara nya ba jaku iya maya bejadika Pengerami Makai Lemai enggau Bejadika Aum Besai Ninting Taun Ke-5 Gerempung Kunteriktor Bumiputera Malaysia ditu, malam tadi.
Nanta mega madah RM450 juta deka diagih dikena ngemanahka jalai perintah besai lebih agi ungkup kunteriktor kelas G1 nyentuk G5.
Tu mega niki urung 48 peratus dibanding taun siti ke udah betuju dikena nyukung kunteriktor Bumiputera ngambika terus besemekih ungkup pemansang menua.
Berebak enggau nya, Nanta mega ngaku agi bisi ruang unkup agih belanja tambah lalu ngarapka lebih mayuh belanja ulih diberi ungkup dudi hari.-TVS
