BETONG, 21 Okt: Semua ejensi perintah ti bekaul diperansang patut chakah agi ngatur Program Randau Pemansang Rama (RPS) ba selampur Sarawak, lebih agi di bagi menua betong.
Sapit Premier Sarawak Datuk Amar Douglas Uggah Embas madah, program serak tu beguna bendar dikena nentuka semua raban ari bemacham renggat umur di menua pesisir, bulih penerang bekaul enggau bantu ari perintah.
“Baka randau kitai tu manah tang enda semua bala ulih datai.
“Nya alai, aku udah berandau enggau Residen minta (program tu diatur) suah agi ba menua Betong.
“Tu beduduk ari mayuh tulung tauka mayuh bantu ari perintah ke patut ditemu rayat.
“Ambika chunto, sida ke beumai betupi ngidupka diri, suntuk nyadi sida tu patut ditulung sereta enda tau diteju,” ku iya.
Uggah ke mega Kaban Kunsil Nengeri (ADUN) Bukit Saban mansutka pekara nya rambau pengerami nutup Program Randau Pemansang Rama (RPS) Betong 2024 ba Rumah Panjai Kelimbang Jaman Penulok, Ulu Layar kemari.
Nangkan ke nya, iya bisi meransang ejensi enggau opis perintah patut ngurangka penyampau limpir keretas pom dikena minta bantu ti patut diisi ngambika ulih ngemudahka pekara diatur sereta diisi pengani rumah panjai.
Program RPS ke diatur Kaunsil Pemansang Rama (MPS) Sarawak serak tu dipasuk 20 ejensi enggau opis ari perintah besai enggau perintah Sarawak, sereta bekerejasama enggau Opis Residen betong enggau Opis Pelilih Betong.-TVS
