BETONG, 21 Okt: Inisiatif ngatur program Randau Pemansang Rama ba rumah panjai dipuji mensia mayuh laban nya ulih meri pemaik baka nyadi pantar endur ngulihka penerang pemadu baru bekaul enggau bantu ari perintah.
Maya dirandau TVS, Tuai Rumah (Tr) Kelimbang Jaman, 39 Taun madahka, program baka nya endang pantar pemadu mana ngagai komuniti di menua peisisir ngulihka penerang pemadu baru sereta bulih penemu ke beguna nengah chara betemu terus enggau perintah.
“Sekumbang program Randau Pemansang Rama tu diatur sida ari Opis Pelilih enggau Opis Pemansang Orang Indu, Anak Mit enggau Pengelantang Komuniti chukup manah laban meri pemaik ngagai rayat di menua pesisir.
“Maya program tu sida ejensi perintah bisi muka eksibisyen ke penerang mensia mayuh nyadi pekara baka tu mantu kami ngelala bagi bantu ke bisi disedia perintah ungkup rayat,” ku iya maya dirandau pemberita rambau pengerami nutup Program Randau Pemansang Rama (RPS) Betong 2024 ba Rumah Panjai Kelimbang Jaman Penulok, Ulu Layar kemari.
Udah nya ba penemu siku orang tuai Thambi anak Itam, 59 taun madah diri meri terima kasih ngagai perintah laban udah ngatur program ke chukup badas baka nya.
“Aku berasai chukup gaga meda perintah uloh ngatur program ke manah baka tu ke pemaik kami ke udah lunggar umur.
“Ari program baka tu kami nemu diri bisi tulung ari perintah nyadi tu chukup besai reti ngagai kami,” ku iya.
Enda tinggal mansutka penemu diri iya nya Maxweal Guan Juah, 24 taun madahka program RPS ulih meri pangka besai ngagai pemansang raban nembiak ba menua pesisir.
“Aku ngarapka program baka tu ulih meri pangka besai ngagai semua raban nembiak ba rumah panjai.
“Arapka program tu mega muka runding sida baka deka ngemajuka diri ke pemaik dudi hari,” ku iya.-TVS
