DEBAK, 21 Okt: Kerejasama enggau Kaunsil Makit Betanam Betupi Perintah Besai (FAMA) Betong ngatur Pengerami Pedagang enggau Pemakai Debak 2024 endang singkang pemadu manah ngagai Kelab Tupai Debak bekalala enggau komuniti serata ngelakuka produk dagang ari menua Debak.
Chairman iya, Mazlan Abdul Manap madah nengah program baka nya sida ulih mantu ngangkatka dagang bala pedagang betanam betupi ari pelilih Debak.
Nya alai, ku iya udah tu Kelab Tupai Debak sedia bekerejasama enggau ejensi-ejensi bukai kelimpah ari FAMA ungkup ngatur program ke sama dudi hari.
“Nyadi kami Kelab Tupai sedia bekerejasama enggau sebarang aja opis baka FAMA dalam ngemujurka program baka tu iya nya mai mayuh agi vendor ungkup program ke sama dudi hari,” ku iya.
Iya mansutka timbal nya maya dirandau pemberita ba taba Pengerami Pedagang enggau Pemakai Debak 2024 ke diatur ba Palan Entepan Kerita Pasar Debak ditu sehari tu tadi.
Ku terang iya pelilih Debak endang ngembuan mayuh produk ke bisi penau dibantai ngagai mensia mayuh sekalika nya ari sukut dagang temuai tauka pemakai.
Pekara nya mega senutuk enggau juluk pengari rayat ari sitak Kunsil Nengeri (DUN) Saribas Datuk Mohd Razi Sitam ti deka meda Pasar Debak terus dikelala baka pelilih bukai di Sarawak.
Ke penerang Kelab Tupai Debak ditumbuh kena 18 Januari 2022 lalu diatu bisi 70 iku kaban nyengkaum raban nembiak ari menua Debak empu.
Sama bisi datai Sekretari enggau Tuai Pekara Wang Kelab Tupai Debak Mohd Tarmizi Mohamad Ali Dan Ahmad Shaffizi Saipol.-TVS
