DEBAK, 21 Okt: Pengawa ngatur Pengerami Pedagang enggau Pemakai Debak 2024 ba Palan Entepan Kerita Baru Pasar Debak ke berengkah kena 23 nyentuk 27 Oktober tu nyelinting penatai 10,000 iku temuai.
Pegawai Kaunsil Makit Betanam Betupi Perintah Besai (FAMA) Bagi Menua Betong, Druz Kairollizman Osman madah, pengerami keterubah iya diatur ba Debak nya deka dipasuk raban vendor ari selampur Sarawak.
“Kitai nyelinting penatai temuai urung 10, 000 iku sampal datai ke Debak sama enggau ngerichahka program keterubah kitai tu.
“Nyadi program tu diatur berengkah 23 nyentuk 27 Oktober tu ngaul mayuh vendor pegari nama ari selampur Sarawak nyengkaum ari Kuching, Sri Aman, Betong, Debak, Sarikei enggau ke bukai,” ku iya.
Iya mansutka jaku nya maya dirandau pemberita pengudah ngabas taba Pengerami Pedagang enggau Pemakai Debak 2024 ba Palan Entepan Kerita Pasar Debak ditu, sehari tu tadi.
Ku terang iya mayuh program udah ditusun dikena ngerichahka pengerami nya baka Pekit Betanda, Mobile Legends, Futsal, Pekit Karaoke, Panggau Pemerindang ti deka dirichahka penanyi baka Aishah Akademi Fantasia enggau Farris Malek Mentor.
Udah nya, komuniti ke diau besemak enggau Pasar Debak bepeluang ngelakuka produk diri empu ngagai mensia mayuh.
Pengawa nutup pengerami nya ila deka digulu Sapit Menteri Pemansang Indu, Anak Mit enggau Pengelantang Komuniti Sarawak ke mega ADUN Saribas Datuk Mohd Razi Sitam.
Pengerami ke diatur begulai Kaunsil Makit Betanam Betupi Perintah Besai (FAMA) Betong enggau Opis Pelilih Mit Debak sereta Kelab Tupai Debak nya bisi nyendiaka 40 buah bansal endur bejual.-TVS
