ENGKILILI, 20 Okt: Opis Menteri Dagang Temuai, Seni enggau Main Asal (MOTAC) Sarawak deka terus negapka kerejasama enggau Opis Seni enggau Main Asal, Penyungkak Dagang Temuai Malaysia (Tourism Malaysia) sereta Krafjari Malaysia dalam negapka industri dagang temuai ngaul ‘Inap Desa’ tauka rumah temuai ba wilayah tu.
Direktor Opis MOTAC Sarawak, Debbie Jenggut Nyelang madah, bepelasarka rikod ba taun 2022, urung 31, 000 temuai bisi ngelawa Inap Desa di selampur Sarawak nengah penatai kasar raban pedagang Inap Desa ti ngerikodka asil RM3.25 juta.
“Bepelasarka rikod ke diterima kami ba taun 2022 suba kitai udah nerima penatai temuai urung 31,000 iku ngelawa rumah temuai.
“Bekau ari nya, penatai pemisi sechara kasar pedagang rumah temuai ke dirikod ba taun 2022 iya nya RM3.25 juta,” ku iya.
Debbie mansutka penerang nya rambau program MOTAC Begulai enggau Komuniti di Sarawak diatur ba Rumah Panjai Liman Legan Nanga Entalau Ulu Skrang ditu, kemari.
Ku iya, penyampau penatai pemisi kasar pedagang Inap Desa nya terus niki ngagai RM3.3 juta ba taun 2023.
Ku terang iya, bisi 54 kluster Inap Desa enggau tiga Inap Kampung di selampur Sarawak.
Beserimbai enggau Program MOTAC ba Rumah Panjai Liman Legan sehari nya, bisi 16 buah rumah panjai ba sitak Ulu Skrang udah diangkat nyadi pemungkal program Inap Desa dibaruh MOTAC.-TVS
