KUCHING, 20 Okt: Semua lima iku tudah sida ke lenyau sepengudah perau ke ditepan sida karam maya belatih ungkup Regata Sarawak udah ditemu pagi tadi.
Nampung penerang ke dibantai Opis Bomba enggau Penyah Penusah Malaysia (JBPM) sehari tu tadi, Operasyen Nyidi enggau Mantu (SAR) masuk hari ketiga berengkah pukul 6 pagi tadi ngena dua buah bot bomba nuju ke Baraj Sungai Sarawak.
Penerang nya mega madahka, tiga iku ari sida nya diemu sepengudah 40 minit operasyen dipejalaika ba endur nya.
“Dua iku tudah sida ditemu pukul 6.16 pagi, siku ditemu pukul 6.40 pagi lalu siku agi ditemu pukul 7.07 pagi ditangkan siku agi ditemu dua minit udah nya (7.07 pagi),” ku iya nengah siti penerang sehari tu tadi.
Ba penusah ke nyadi kena hari lima tu tadi, lima iku tudah sida nya diripotka lenyau sepengudah perau lumba ke ditepan sida begulai engau 11 iku bakih ke bukai benung belatih ungkup bepekit maya Regata Sarawak.
Insiden nya dipelaba ketegal perau sida tama ai sepengudah dipangka gelumbang ke nyadi ari sebuah bot orang berikan ke datai ari mua sida enda jauh ari Royal Bay Commercial Centre, Bintawa.-TVS
