ENGKILILI, 20 Okt: Industri dagang temuai ba sitak Kunsil Nengeri (DUN) Engkilili dikeandal terus ngerembai nengah pemisi jalai Ulu Skrang ti deka tembu dikemanah enda lama agi.
Kaban Kunsil Nengeri (ADUN) Engkilili Dr Johnical Rayong Ngipa madah kelimpah ari projek ngaga jalai raya baka ke udah disebut Sapit Menteri Besai Datuk Seri Zahid Hamidi ke beungkus RM300 juta sebedau tu, bisi mega projek jalai rata ke udah dikemendar deka digaga nengah Ejensi Pemansang Sri Aman (SADA).
Projek jalai tu nyengkaum Jalai Sebeliau- Ulu Skrang iya nya berengkah digaga ari Sekula Primari (SK) Nanga Entalau ke Sebeliau.
“Aku ngasai nengah (pemisi) infrastruktur tu ila penatai bala temuai kitai kitu deka betambah, sida kitu nyangka berengkah jalai perau ngena sungai enggau pulai ulih nengah jalai darat laban kitai udah tu ila deka bisi jalai penyambung infrastruktur jalai raya ke lebih menyana udah tu ila,” ku iya.
Dr Johnical mansutka penerang nya maya dirandau media pengudah Program MOTAC begulai enggau komuniti di Sarawak diatur ba Rumah Panjang Liman Legan Nanga Entalau Ulu Skrang Engkilili, ditu kemari.
Ku iya, endang pekara dikearapka iya deka meda rayat menua pesisir lebih agi ba Ulu Skrang ngasaika pangka pemansang ari sukut sosio ekonomi nengah industri dagang temuai enggau kraf jari.
Peranak menua peisisir ku iya endang bisi pengelandik kediri empu ngaga bemacham produk kraf ungkup dijual ngagai bala temuai.
Ke penerang maya nemuai ke Sarawak bulan Julai taun nyin kemari, Sapit Menteri Besai Datuk Seri Ahmad Zahid Hamidi udah ngemendarka agih sepenyampau RM300 juta dikena ngemanah jalai ulu skrang ke ngembuan 50 kilometer pemanjai.
Maya penemuai nya, Datuk Seri Zahid Hamidi bela bisi madahka agih belanja sepenyampau RM5.76 juta ungkup ngaga jematan semin tegap ba Nanga Entalau.-TVS
