MIRI, 20 Okt: Projek ngaga Kompleks APMM Miri ti beungkus RM118.3 juta udah tembu penuh.
Menteri Kereja Raya (KKR) Dato Sri Alexander Nanta Linggi madahka, nengah penumbuh begunan baru tu, APMM Miri ulih bejalaika pengawa nyadi palan servis pengelikun ti setikas enggau palan pengelikun ke bukai.
Ku iya madah, tu senutuk enggau pemansang pengereja asal baka minyak enggau pengawa berikan di Tebing Tasik Miri.
“Begunan APMM Miri digaga enggau kapasiti 95 unit palan diau enggau 80 Unit Kelas F sereta15 Unit Kelas D.
“Palan tu disikap enggau bilik tinduk, bilik mandi, dapur enggau bilik besai.
“Ungkup begunan administrasyen, disikap enggau bilik direktor, bilik sapit direktor, dewan mayuh guna , gimnasium, bilik jil enggau mega surau.
“Pia mega bisi disikap enggai 179 palan paking, 79 paking mutosikal enggau perengkaguna ke bukai.
“Aku ngarapka pemeri KKR dalam pengawa ngaga begunan APMM Miri tu ulih nyadi peransang ngagai APMM Miri terus nyingkang nyadi siti ari Palan Pengelikun ke tebilang ti nyendiaka servis pengelikun di Wilayah Utara Nengeri Sarawak ungkup pengelantang rayat,” ku iya.
Iya madah munyi nya lebuh bejaku ba pengerami nyerahka Projek Kompleks Ejensi Penerit Maritim Malaysia (APMM) Pelilih Miri, ditu sehari tu tadi.
Tandu iya, begunan tu beguna bendar dikena ngenegapka pengelikun enggau pengelantang tebing tasik di Miri enggau wilayah utara Sarawak.
Projek ngaga Kompleks APMM Miri tu mega senutuk enggau Langgur Pemansang Malaysia Lumpar ke-11 ke ngembuan pemesai bungkur kandang endur iya nya 6.25 ekar.-TVS
