KUALA LUMPUR, 19 Okt: Sektor pelajar menua nerima agih belanja pemadu tinggi dalam sejarah bajet nengah pemeri RM64.1 bilion disediaka perintah berengkah 2025.
Menteri Besai Datuk Sri Anwar Ibrahim madah, pekara pelajar mengkang nyadi pekara pemadu dikemerat dikena nentuka endur belajar ke lantang, likun enggau lebih menyana ungkup rebak baru di menua tu.
“RM2 bilion disediaka ungkup projek ngemanah enggau ngaduka sekula ba selampur menua. RM1 bilion lebih agi dikena ngemanah semua bansa sekula lebih agi pendiau bilik kelas ke udah repuk.
“Tu nyengkaum ba sekula bansa, sekula China, sekula Tamil, sekula pengarap, sekula dalam kem soldadu enggau sekula pelajar khas OKU. Kelimpah ari nya, RM1 bilion agi dikena ngemanah perengkaguna repuk ba 543 buah sekula lebih agi ba Sabah enggau Sarawak,” ku iya.
Iya madah munyi nya rambau mantaika Bajet 2025 di Dewan Rayat, lemai kemari.
Ku terang iya, bisi 44 buah sekula baru deka digaga taun baru iya nya SK Bandar Putra Indah, Batu Pahat, Johor; SMK Bandar Seri Putra (2), Hulu Langat, Selangor;
SMK Lok Kawi, Putatan, Sabah; SMK Semeling, Sungai Petani, Kedah; enggau SK Dudong, Sibu, Sarawak.
Berebak enggau nya dikena nentuka ulih japai internet di sekula menua pesisir enggau menua ulu, perintah setuju bejalaika program sambung infrastruktur jalur lebar chara tali arus tetap ba sekula di menua pesisir nengah agih penyampau RM100 juta.-TVS
